And It Came to Pass in Those Days...
Via Teresa Nielsen Hayden, Helge Kåre Fauskanger at Ardalambion:
Making Light: Texts, 2011: Ar túlë entë auressen i etelendë canwa Auhustus i Táraranello, i mo notumnë quanda ambar. Minya notië sina martanë írë Quirinius nánë cáno Sírio. Ilyë queni lender náven nótinë, ilquen véra ostoryanna. Yando Yósef lendë amba Alilëallo, et i ostollo Nasaret, mir Yúrëa, Laviro ostonna, ya ná estaina Vet-Lehem, pan anes maro ar nossëo Laviro, náven nótina as María ye nánë antaina sen vestalessë, ar ye sí nánë lapsarwa.
Írë engettë tassë, i lúmë túlë yassë columnes lapserya. Ar colles yondorya, i minnóna, ar se-vaitanes ar panyane se salquecolcassë, pan lá engë tún nómë mí marmen. Enger mavalli i imya nóressë i marner i restassë, tírala lámáreltar i lómissë. Ar i Héruo vala tarnë ara te, ar i Héruo alcar caltanë os te, ar túra caurë nampë te.
Mal i vala quentë téna: “Áva rucë, pan inyë cára sinwa len túra alassë ya nauva i quanda lien, an anaië cólina len síra Rehtando, ye ná Hristo, i Heru, Laviro ostossë. Ar si nauva tanna len: Hiruvaldë vinimo, vaitana ar caitala salquecolcassë.” Ar rincanen engë as i vala rimbë i meneldëa hossëo, laitala Eru ar quétala: “Alcar i tarmenissen na Erun, ar cemendë rainë atanin pa i sanas mai."
